Sa laschar vaccinar encunter il coronavirus vegn ad esser gratuit. Per quai ha il Departament da l'intern adattà l'ordinaziun da prestaziun da las Cassas da malsauns. Uschia vegn la virola surpigliada da la cassa da malsauns obligatorica. Confederaziun e chantuns portan er ina part dals custs per la virola, quai communitgescha l'EDI. La revisiun vala a partir dal prim da schaner 2021.
Vaccin sco element impurtant cunter la pandemia
Vaccinar vegnia ad esser impurtant en il cumbat cunter Covid-19. La finamira da la strategia da vaccinar da la Confederaziun saja, da impedir grevs andaments da la malsogna tar persunas da risico sco er da proteger il sistem da sanadad. Ina ulteriura finamira saja, da minimar consequenzas economicas e socialas. Las emprimas vaccinaziuns duai dar en Svizra en la prima mesadad dal 2021 – uschè svelt che Swissmedic ha acceptà in vaccin. In obligatori da vaccinar na duai quai betg dar.