La Crusch Cotschna Svizra ha rimnà l’ultim temp damain daners pervi dals problems persunals. Gronds fauturs privats spetgian enfin che la situaziun saja sclerida – ha communitgà l’ovra d’agid al «SonntagsBlick». Las consequenzas a media vista na possian anc betg vegnir stimadas.
Politica fa pretensiuns
Entant pretendian politichers che la presidenta da la Crusch Cotschna Svizra, Barbara Schmid-Federer, sa retiria. Quai rapporta la «SonntagsZeitung». Sche la fidanza saja davent, lura saja l’instituziun periclitada, ha ditg il cusseglier dals chantuns da la PPS, Alex Kuprecht, ch’è commember da la gruppa parlamentara da la Crusch Cotschna, envers la gasetta da la dumengia.
Inscunter cun anteriur directur
Il mardi duaja dar in inscunter tranter l’anteriur directur da la Crusch Cotschna Svizra, Markus Mader ed il substitut da Schmid-Federer – sco il «SonntagsBlick» scriva.
Rapport independent crititgescha structuras e surtut la presidenta
Avant paucs dis è cumparì in rapport indepentent en connex cun ils virivaris tar la Crusch Cotschna Svizra. La separaziun dal directur da blers onns Markus Mader saja stada intransparenta, nunprofessiunala ed inumana. En pli crititgescha il rapport la presidenta Barbara Schmid-Federer ferm: Ses cumportament entaifer il cussegl da la Crusch Cotschna e surtut envers il directur sajan indizis ch’ella saja strusch qualifitgada da manar e ch’ella n’haja betg il curaschi da prender per mauns ina sfida.
Schmid-Federer refusescha questas renfatschas. Il rapport independent saja manglus.
