Il chantun Berna sa mussa dischillusiunà da l’Uffizi federal da sanadad BAG. La raschun è ina stretga da furniziun dal vaccin Moderna. Davart quella stretga sajan ils chantuns pir vegnids infurmads venderdi saira. E quai saja be in di suenter l'inscunter dal cusseglier federal Alain Berset, il BAG e tut ils directurs e directuras da sanadad che hajan pretendì betg pli conservar la segunda dosa dal vaccin sco reserva.
Il chantun Berna pretenda da la Confederaziun da s’orientar da nov tge che pertutga il persunal sco er da surdar la responsabladad per la furniziun ad experts da l'economia. Quai scriva la directura da sanadad dal chantun Berna.
BAG refusescha critica
La raschun per il retard haja da far cun il producent e betg cun la Confederaziun. Quai ha declerà Lukas Engelberger, il president dals directurs e las directuras chantunalas da sanadad. Sco quai che la scheffa dal BAG, Anne Lévy, ha ditg envers Radio SRF hajan ins intervegnì immediat tar Moderna ed uschia cuntanschì, ch'almain ina part dal las dosas da vaccin empermessas sajan vegnidas furnidas.
