Ils hackers ch'an prendì en mira la vischnanca da Rolle, en il chantun Vad, na vegnan betg a nizzegiar sezs las datas enguladas. Quai sajan autras persunas che vegnian a malduvrar las datas en il darknet, ha ditg la gruppa da hackers che sa numna Vice Society a la gasetta Le Temps.
Forsa vegnan las datas duvradas d'enzatgi per in credit, forsa er dad auters criminals. Quai n'interressescha betg nus. Quai è il problem da Rolle.
Datas d'interpresas ch'els attatgian, vegnian telechargiadas e publitgadas sch'ellas sajan interessantas. Ma els na vendian naginas datas, els survegnain daners sur autras vias. La vischnanca da Rolle n'haja betg contactà els ed i n'haja er betg dà negoziaziuns.
Autras vischnancas pudessan suandar
Plinavant han ils hackers avertì, ch'els vegnian ad attatgar autras vischnancas svizras, sch'els hajan access. Per els na gioghia nagina rolla sche las datas interessantas vegnian da vischnancas u interpresas.