Sin blers plazzals en il Chantun Turitg na sa mova oz nagut. Ils sindicats Unia e Syna han appellà da far chauma. En la regiun Basilea ed en la Svizra franzosa hai gia dà acziuns da protesta il cumenzament dal mais. Oz suonda Turitg, Berna, la Svizra Centrala e la Svizra da l'Ost. Las 11:30 duai avair lieu ina gronda demonstraziun a Turitg. Er l'Unia Grischun e da la Svizra da l'Ost vulan trametter ina delegaziun a quella.
Dapli paja e temp da lavur maximal
Ils sindicats vulan uschia far squitsch sin las interpresas da construcziun. Actualmain vegn numnadamain contrahà da nov il contract collectiv naziunal da lavur. Tranter auter vai per ina cumpensaziun da chareschia, dapli paja reala e temps maximals da lavur. Uschia vul la societad d'impressaris variar per exempel tenor stagiun il temp da lavur da l'emna tranter 30 e 48 uras enstagl da 37,5 e 45 uras. Ils sindicats èn cunter questa midament.
La societad d'impressaris ha crititgà la chauma, tenor els saja quella cunter l'obligaziun da mantegnair la pasch. Las tractativas per il nov contract collectiv naziunal da lavur girian numnadamain actualmain anc. L'Unia crititgescha ch'ils impressaris vegnian be cun smanatschas e n'offrian betg soluziuns en las tractativas .
