Las attatgas da hackers sin paginas d'internet da la Confederaziun cuntinueschan. Tenor il center da segirtad da cyber sajan ellas nunusitadamain intensivas. Ils hackers adatteschian trasora lur tactica a las mesiras da protecziun. Anc adina n'èn pliras paginas betg cuntanschiblas.
La gruppa «Noname» ch'è stada responsabla per las attatgas dad ier ha tenor il center colliaziuns cun la Russia. Ins possia sulettamain specular davart ils motivs per las attatgas.
12-06-2023
Bloccà preschientscha online da l’administraziun federala
- Pliras paginas d’internet da l’administraziun federala n’èn betg stadas cuntanschiblas.
- Sco il Departament federal da finanzas ha communitgà, saja la raschun ina attatga DDoS sin ils sistems da l’administraziun federala.
- Spezialists hajan spert constatà l’attatga ed hajan prendì mesiras per pussibilitar svelt da puspè cuntanscher las purschidas.
Il portal da la regenza svizra admin.ch è vinavant stà cuntanschibel. Il disturbi ha pertutgà differentas paginas da l’administraziun federala e da manaschis ch’èn datiers da la Confederaziun.
La gruppaziun «Noname» haja surpiglià la responsabladad per l’attatga. La gruppa è medemamain stada responsabla per l’attatga sin parlament.ch ch’è vegnida enconuschenta l’emna passada.
Er servetschs da la SBB pertutgadas d'ina attatga DDoS
La pagina d'internet da las Viafiers federalas n'era medemamain betg cuntanschibla glindesdi endamaun. Er n'èri betg pussaivel da cumprar bigliets via la l'applicaziun da telefonin. Tenor la SBB haja il disturbi cuzzà da las 08:00 fin ca. las 09:45 e saja entant schlià. Er tar la viafier era la raschun per il disturbi ina attatga DDoS. Sche las attatgas sin l'administraziun federala e la SBB han in connex n'è betg cler.
