Il concern d'energia grischun Repower ha fatg in gudogn da 176 milliuns francs l'emprim mez onn da fatschenta. Quest gudogn è pli che quatter giadas pli aut cumpareglià cun la medema perioda da l'onn passà, sco la Repower scriva.
Buna fatschenta d'export
Il gudogn vegnia cunzunt da l'export d'energia. En cumparegliaziun sajan ils gudogns da la fatschenta en Svizra «marginals», scriva la Repower. Damai che la Repower s'orienteschia vi dals custs da producziun tar las tariffas per il Grischun, saja la populaziun stada schanegiada dals auts pretschs d'energia en l'Europa.
![Repower](https://www.rtr.ch/static/cms/images/960w/323b32.jpg)
La producziun da forza electrica è stada ils emprims sis mais da quest onn sut la media da plirs onns. Raschuns sajan la pauca naiv luada e lavurs da mantegniment vi d'in pèr implants da producziun.
Investiziuns
Dasper l'ovra solara sin il Vorab vul la Repower investar en pliras ovras solaras en l'Italia e spetgia anc sin lubientschas. En tut ha la Repower investì en l'emprima mesadad dal 2023 53 milliuns francs, da quels 16 milliuns francs en ovras solaras ed ovras da vent en l'Italia, e 19 milliuns en la sanaziun da l'ovra idraulica a Robbia.