En Svizra ed il Principadi da Liechtenstein hai dà entaifer in di 274 novas infecziuns cun il coronavirus. Quai ha annunzià l'Uffizi federal da sanadad la mesemna. I sa tracta dal pli aut dumber dapi l'avrigl. Il mardi avevi dà 187 cas novs, glindesdi èsi stà 105 e dumengia 152. Mortoris hai dà in nov, total èn mortas en Svizra 1'714 persunas.
En il Grischun hai dà duas infecziuns novas. Actualmain n'è nagin en in ospital grischun pervi da Covid-19.
Quarantina ed isolaziun
Plinavant ha la Confederaziun er annunzià ch'i sajan per il mument 1'331 persunas en isolaziun, 4'446 contacts da quels èn en quarantina. Supplementarmain èn il mument 18'244 persunas en quarantina, suenter ch'els èn turnads d'in pajais u ina zona da ristg.
En Grischun èn il mument 16 persunas en isolaziun e 57 en quarantina.