Entant ch'il sgol Turitg-Londra-Turitg custa a la bursa 478.30 francs, custa quel al clima 192 kilograms emissiuns da CO2. Cun uschè bler CO2 pon ins emplenir 39'200 balluns u 17'000 ballas da ballape. La passiva che sgular lascha enavos en furma dad emissiuns donnegia il clima. Perquai lavuran diversas firmas vi da soluziuns alternativas. Ina da quellas firmas è Svizra Synhelion. Quella ha chattà ina metoda da far carburant sintetic sulettamain cun energia solara.
La dumonda per il carburant è gronda, dentant n'existan anc naginas pussaivladads da producir en massas.
E cun quai che la producziun è per il mument anc fitg pretensiusa custa il carburant sintetic ina massa. Actualmain 4 fin 6 giadas dapli ch'il cherosin, di la pledadra da medias da la societad aviatica Swiss Karin Montani. La Swiss investescha en Synhelion. Las finamiras èn numnadamain autas da la societad aviatica. Dentant èn era las ambiziuns da Synhelion grondas.
Fin il 2050 vulain nus be pli sgular cun carburant sintetic.
Augmentar massivamain la producziun dal carburant sintetic
Per il mument erigia Synhelion in implant da producziun a Jülich en la Germania. L’implant duai esser en funcziun la fin da quest onn. L'emprim implant commerzial duai ir en funcziun quest onn en Spagna.
Davent dal 2030 vul la firma producir 875 milliuns liters per onn da carburant sintetic. Quai cuvriss la mesadad dal carburant che la Svizra dovra en in onn per sgular. Ils custs duain era arrivar sut in euro per liter. Quai fiss dentant anc adina pli char che quai ch'il cherosin custa oz. Fin il 2040 duai la capacitad vegnir augmentada sin 50 milliardas liters carburant. Quai cuvriss perfin la mesadad dal carburant ch'il spazi european dovra.
L’energia che vegn duvrada per far il carburant da solar, vegn dal tuttafatg dal sulegl. Uschia è il process era independent da la rait d’energia. Aviuns u autos che van cun il carburant da solar èn neutrals al clima. Els van senza sbuf da CO2.
La tecnica dal carburant da solar ha inventà il start-up svizzer Synhelion, che ha sias ragischs a l’ETH a Turitg. Persunas ch’han fundà Synhelion han perscrutà a l’ETH la tecnologia, han patentà il carburant da solar ed han uss exclusiv las licenzas da la Scola politecnica federala. Synhelion vala sco precursur tar il carburant sintetic (SAF*). In grond avantatg è, ch'il carburant da solar è cumpatibel cun l’infrastructura da carburant ch’exista. Vul dir ils motors actuals na ston betg vegnir midads ora.
*Carburant sintetic vegn scursani cun SAF (Sustainable Aviation Fuel)
Swiss registrescha dapli cumpensaziun
Tgi che cumpra in bigliet per sgular tar la Swiss ha l'opziun da cumpensar il sgol. Dapi quest onn pon ins pajar il bigliet e la cumpensaziun en ina. Dapi che quai è il cas cumpenseschan 10 giadas dapli persunas lur sgols, di Karin Montani da la Swiss. Avant cumpensavan var 1% ils sgols, ed uss èn quai 10%. Dentant anc adina memia pauc, di la pledadra da medias. Els vulan augmentar questas cifras.
Per cumpensar ils sgols datti differentas opziuns: cun projects da clima, cun projects da clima e carburant sintetic (SAF) e sulettamain cun carburant sintetic. Tut tenor sgol pon las opziuns sa differenziar. Tar l'exempel Turitg-Londra-Turitg custass la cumpensaziun per ils 192 kilograms emissiuns CO2 143.38 francs. Cun quai vegn il sgol var 1/3 pli char.
L'opziun da cumpensar cumplainamain cun SAF n'è dentant betg quella che vegn duvrada il pli savens, di Montani. Passagieras e passagiers sa decidan il pli savens per l'opziun maschadada.
Cun differentas firmas han ins dentant pudì far contracts, e quellas s’obligheschan da cumpensar ils sgols da fatschenta mintgamai 100% cun il carburant sintetic (SAF).
Sgular daventa pli char
Per l'avegnir spera Montani che la producziun dal SAF vegnia pli bunmartgada e ch'i dettia avunda sin il martgà. Ina finamira che Synhelion ha era. Dentant, tant Karin Montani sco era Gianluca Ambrosetti èn perina che sgular daventa pli char en l'avegnir. Il carburant sintetic vegn ad esser era cun la producziun da massa anc pli char ch'il cherosin. Dentant saja il punct il pli impurtant ch'ils custs per l'ambient possian uschia vegnir sbassads.