Brienz en il chantun Berna - Reto Filli ed il cumbat cunter la bova

L’idilla cun la bell’aura cugliuna. Igl è in purtret trist. Radund trais mais suenter la catastrofa da la natira ves’ins a Brienz, dasper Interlaken, anc adina fastizs da la bova dals 12 avust 2024. Qua ina pluna laina e là in mantun belma, diversas chasas devastadas cun massas da belma tranter las fanestras e paraids che mancan – e tranteren pliras maschinas da bajegiar.

Reto ­Filli è schef dal uschenumnà RFO Oberer Brienzersee, il stab directiv, ed el ha passentà bleras uras qua, l’ultim temp. En ina summa da francs concreta na possia el anc betg dir quant che questa catastrofa vegnia a custar. Quai saja la fin finala la chaussa da la vischnanca e las segiranzas. Ma il pli impurtant saja ch’i n’haja dà naginas feridas pli grondas u perfin morts.

865 chars da viafier plain grava

Brienz, la vischnanca partenaria da Brinzauls (Albula/Alvra), ha en sasez experientscha cun bovas e malauras. Gia il 2005 aveva ina bova devastà ina part dal vitg e chaschunà pliras victimas. «Or da quella experientscha han ins bajegià plirs rempars, tranter auter er in tar il Milibach, quel aual ch’è questa giada ì suror», declera Reto Filli. Il rempar fiss stà pensà per 12'000 meters cubics material. Pervi da la blera plievgia è però sa furmada ina bova da glera, belma e crappa ch’era trais giadas pli voluminusa, numnadamain 65'000 meters cubics.

Tenor ils geologs ed ils spezialists è quest eveniment stà dad ina grondezza, ch’ins po spetgar be mintga 300 onns, pia fitg insolit. Ma tuttina èsi stà questa stad uschia, che l’energia da la gronda plievgia ha activà la bova.

Far urden cun il caos

Sin l’autezza dal santeri ch’era sco las vias ed ils ierts sper il Milibach vegnì inundà da la bova, raquinta Reto Filli co che quai era ì quel di dals 12 d’avust. Dal mument suenter l’alarm e la mobilisaziun enfin ch’el è stà sco capo RFO sin il plaz per ses emprim eveniment serius, ha el numnadamain anc gì da returnar da sia plazza da lavur tar l’Armasuisse a Berna enfin a Brienz. «Cura che la centrala d’alarm m’ha mobilisà, hai jau prendì il tren vers Brienz, ma quel è be ì enfin a Spiez e da là davent eran ils binaris gia interruts pervia da la bova», sa regorda Reto Filli dal stentus viadi. «Durant la stad avain nus fitg blers turists cun bler bagascha, e quella saira a Spiez eran radund 300 persunas a la staziun senza savair co vinavant. Per cletg ha il manaschi da transport organisà in bastiment e cun quel è tut la glieud alura tuttina vegnida a sia destinaziun.» Enfin che Reto Filli era a Brienz sin il plaz eri gia suenter las diesch, sa regorda el. «E lura avain nus empruvà da far urden cun il caos.»

Ils asens eran scappads

Per tut il team dal RFO è quai stà l’emprim eveniment serius. Ch’els hajan gia adina puspè fatg exercizis co ch’i fiss da manar tras il process per schliar problems. «Ma cura ch’i vala è quai tut auter. L’emprim mument èn extrem bleras infurmaziuns vegnidas tar nus. Quai ha vulì pliras uras enfin che nus avain realisà l’entira dimensiun e fin che nus avain pudì sortir las lavurs tenor prioritad. L’emprim dal tut avain nus natiralmain stuì segirar ch’i na capitia betg anc dapli.» Cunquai che las prognosas da l’aura n’eran betg propi bunas, hajan els subit cumenzà da far lieu per anc dapli auas grondas u schizunt bovas, per il cas ch’i fiss vegnì anc ina giada.» L’evacuaziun da las 70 persunas aveva la polizia gia fatg. E la gronda part dals evacuads haja pudì ir tar vischins. Ma per in pèr persunas haja il RFO gì dad organisar in alloschi.

Quai che saja alura vegnì pir en il decurs dal proxim di sajan stadas tut las annunzias pertutgant ils animals, raquinta Reto Filli. «Ina gruppa da set asens era scappada gia curt avant che la bova era vegnida. Uss eran quels asens però serrads en sin in toc prà e n’avevan nagina aua. Nus avain pudì organisar cun in helicopter aua per ils asens», descriva Reto Filli ina da las bleras episodas cun animals. «Quai che ha gidà extrem bain è stada la communicaziun sur tut ils chanals pussaivels. Uschia ha la glieud pertutgada pudì inoltrar dumondas e pissers e nus avain pudì dar fitg svelt infurmaziuns.»  Els avevan installà in chanal sur WhatsApp per infurmar la populaziun ed avevan fin l’ultim bunamain 2000 abunents.

Quatter uras per durmir

Durant quellas duas emnas suenter la catastrofa ch’il RFO è stà en il modus da crisa haja Reto Filli durmì en media be circa quatter uras per notg. «Ma quai è i bain, nus avevan adina tantas decisiuns da prender e lavur da far, ch’i bastava tranteren be per in curt powernap e lura gievi puspè vinavant. Jau hai plitost gì suenter il sentiment, cura che tut era passà, che jau haja memia bler temp da durmir», conceda Reto Filli cun in surrir.

Guardond enavos haja dà ina u tschella situaziun difficila. «La dumonda tge far cun il santeri e las fossas en dischurden, era per exempel ina dumonda difficila per noss gremi da milissa. Quai avain nus per cletg pudì surdar al plevon da Brienz.»

Ma i haja era dà in mument nunspetgà cur ch’il capo da la protecziun civila, ch’era responsabel per diversas lavurs logisticas sco per exempel gidar a far urden, proteger la zona da privel ma era procurar per vivonda per tut ils gidanters, haja communitgà che lur temp d’agid saja a fin. «Alura hai jau gì dad escalar questa situaziun envers ensi –  e quai va lunsch si en la politica – ma cura che jau hai explitgà al capo il pli sisum, ha quel natiralmain schon realisà che l’organisaziun da la protecziun civila vegnia anc duvrada in pèr dis e na po betg simplamain far fagot amez la catastrofa.» Che l’emprim telefon cun il capo local da la protecziun civila na saja alura betg stà uschè bel, ma suenter saja stà cler per tuts ch’i dovria anc in zic agid.

Tut en tut è Reto Filli fitg cuntent cun la prestaziun da ses team. Era la populaziun haja mussà la stima per lur lavur, quai sa mussia era cun in premi che vegn surdà al RFO da la communitad dals vischins.