La fin da zercladur èn las temperaturas creschidas fin sin 36 grads. Perquai èn intgins binaris sa defurmads en differentas parts da la Svizra. Tras quai è il traffic da trens stà disturbà ferm. Pervi da quai examineschan las Viafiers federalas, tranter auter, sche binaris alvs pudessan esser la schliaziun. Quai ha communitgà l’SBB ad ina conferenza da medias.
Binaris alvs pudessan mantegnair lur temperatura fin set grads pli bass ch’ils binaris actuals. Durant l’unda da chalira annunziada vegn’ins a far anc dapli tests, uschia las Viafiers federalas.
Binaris alvs er tar la Retica
Er la Viafier retica ha gì il zercladur difficultads cun la chalira. Ella ha testà gia plirs onns il sistem cun ils binaris alvs ed ha perquai colurà quest onn binaris en plirs lieus en Grischun:
Bleras occurenzas grondas
Pervi d'occurenzas grondas porscha l'SBB quest onn bunamain 2'000 trens spezials. La mesadad da quels 2'000 trens èn per la Fête des Vignerons a Vevey. Dus auters gronds eveniments eran la Festa federala da gimnastica ad Aarau ed il Züri-Fäscht. Proximamain vegn lura anc ad avair lieu la Festa da lutga federala.
RR novitads 12:00