La bell'aura da Pasca ha procurà per blera lavur per la Rega. Sco il servetsch da salvament communitgescha, hajan els gì passa 180 engaschaments en l'entira Svizra e trais sgols internaziunals per returnar pazients ord l'Africa dal sid, da l'Italia e dal Kosovo. Cun bun 50 engaschaments è la dumengia da Pasca stada il di pli intensiv per las equipas da helicopter.
Sgols da salvament èn stads dumandads en l'entira Svizra, quai per persunas malsaunas e transferiments en in auter ospital, sco er suenter accidents en las muntognas, accidents da traffic e da sport.
L'aura haja in'influenza directa sin las activitads dal temp liber da la populaziun svizra e da turists da l'ester. E cunquai era sin il dumber da sgols da la Rega.
