En l'archiv federal a Berna sa chattan mappas verdas che derivan da l'aviatica militara svizra. Intginas èn inscrittas cun «plats sgulants». En l'acta militara «E5465B» da l'onn 1954 infurmescha il servetsch d'infurmaziun da l'aviatica militara pilotas e pilots e funcziunaris tge ch'ins sto far, sch'ins vesa in ufo en Svizra.
In’autra, l’acta militara «E5465B» da l'onn 1954 infurmescha il servetsch d'infurmaziun da l'aviatica militara pilotas e pilots sco er funcziunaris, tge ch'ins sto far, sch'ins vesa in ufo en Svizra.
En quella hai num: «Directivas per elavurar questiunaris davart objects betg identifitgads (...) Igl n’è betg nossa incumbensa da perscrutar tenor la cumposiziun, la derivanza u la finamira da talas cumparsas. Nossa incumbensa è plitost da registrar quests fenomens en in sistem ordinà».
Il radio e la televisiun da la Svizra franzosa (RTS) ha contactà in tozzel d'anteriurs pilots da l'armada svizra. Plirs han confermà l'existenza da quests formulars d'annunzia. Els pretendan che quests formulars d'annunzia sajan vegnids utilisads fin ils onns 1990.
«Moviments sco ina serp»
En l’archiv federal ha RTS chattà in pugn plain da quests formulars emplenids. Els pertutgan las observaziuns fatgas da commembers dal militar u funcziunaris dal ministeri da defensiun. L’annunzia la pli fascinanta datescha da l’enviern 1971. En trais differents documents militars vegniva rapportà d’in e dal medem object sgulant.
En l'emprim document han dus uffiziers a bord d'ina Mirage III observà sur Interlaken in «cler punct da glisch» che sa muventava svelt. Ils moviments vegnan descrits sco nunpussaivels per in aviun militar da lez temp. «L'object da glisch è sa muventà cun in moviment en furma d'ina unda, sco ina serp, e lura svanì.»
En in segund rapport militar è in auter pilot che pretenda d'avair vesì il medem ufo in pèr uras pli tard. Questa giada è el vegnì vesì sur Winterthur. Al rapport stat ina skizza dissegnada dal pilot che declera ils moviments e la grondezza da l'object traglischant.
Uffizialmain nagin interess per ufos
Trais dis pli tard è il Ufo puspè vegnì observà d’in pilot da Mirage III. Il schuldà ha era emplenì ora in rapport. En quel hai num: «L’emprim hai jau pensà ch’i saja in aviun cun reflecturs envidadas che sgulava vers mai, ma jau hai sentì tuttenina che l’object traglischant pareva stagnà. (...) L’object glischant è sa muventà e svanì.»
Quests rapports militars na furnivan nagina decleraziun scientifica per la natira da quest object. Tge che fa tut quai anc pli misterius: ils documents originals èn svanids. La biblioteca dal Guisanplatz, l'anteriura biblioteca militara federala, declera: «Nus avain mo ina copia da l'acta; l'original n'è betg da chattar.»
Uffizialmain renfatscha l’Armada svizra da mai esser s’interessada per ufos. La pledadra dal Departament da defensiun, Delphine Schwab-Allemand, declera che l’armada n’haja betg in program spezial. «L’armada svizra n’ha betg e n’ha mai gì l’incumbensa da collecziunar infurmaziuns u documents davart ufos.»
