Tochen uss avevi adina gì num che tut las 160 persunas ch'abiteschan a Mitholz, en la Surselva Bernaisa, stoppian bandunar la vischnanca. Quai pervi dal magasin da muniziun da l’armada che vegn rumì. Uss ha il Departament federal da defensiun relativà ses plans.
Zonas da privel
Il departement parta la regiun en pliras zonas da privel. Tgi ch'abitescha datiers da la materia explosiva stoppia definitivamain bandunar il vitg. I vegnia dentant era a dar zonas nua ch'ils abitants possian restar a Mitholz. Uschia ha il Departement federal da defensiun infurmà. Enfin mez da l'auter onn vul il departament avair sclerì tgi che dastga star e tgi che sto bandunar il dachasa per motiv da segirtad.
Dal 2030 fin 2040
L’acziun da rumida cumenza l'onn 2030 e cuzza diesch onns. Dentant era avant vegni a dar lavurs preparatoricas. Avant varga 70 onns era il deposit da muniziun da l'armada explodì. Quel veva destruì la pli gronda part da las chasadas da Mitholz. Nov persunas eran mortas.