La midada dal clima saja gia daditg da sentir sin ils bains purils. Gist la setgira da la stad passada saja stada la pli lunga e pli chauda senza plievgia dapi ch'ins ha cumenzà a nudar sistematicamain l'aura avant varga 150 onns.
L'agricultura è dentant er cunresponsabla per las emissiuns da serra, quai cun ina cumpart da 13%. L'Uniun purila svizra emprovia er da reducir ina part da quellas emissiuns. Da lavurar dal tuttafatg neutral dal profil da CO2 saja però grev, cunquai ch'ils animals sezs produceschian da natira anora CO2, uschia il president da l'Uniun purila svizra Markus Ritter.
Schanzas e cunfins
L'agricultura saja tuttina interessada vid ina meglra bilantscha dal clima, uschia Ritter. Pertge gist l'agricultura saja pertutgada da las consequenzas da la midada dal clima. I dettia adina dapli eveniments da l'aura extrems, sco schelira, granella, stemprads, lungas fasas da cun u senza plievgia.
Da muntada centrala saja perquai la revisiun da la lescha da CO2. Actualmain è l'agricultura responsabla per 13% dals gas cun effect da serra. La nova lescha da CO2 duai fixar ina finamira pli bassa.
RR actualitad 17:00