- La procedura penala cunter l'anteriur procuratur public federal Michael Lauber, il president da la Fifa Gianni Infantino, il procuratur general vallesan Rinaldo Arnold ed ulteriurs inculpads vegn messa ad acta.
- En il decurs da l'inquisiziun cumplessiva n'è il suspect che la Fifa haja laschà far ina instrumentalisaziun da la Procura publica federala betg sa mussà.
- Il suspect dal malfatg è vegnì sclaus, quai tenor ina communicaziun dal procuratur extraordinari da la Confederaziun.
- Investigaziuns hai dà pervia da violaziun dal secret d'uffizi, pervia da l'abus d'uffizi e favurisaziun respectivamain incitaziun en chaussa.
La procedura penala cunter l’anteriur procuratur public general Michael Lauber ed il president da la Fifa Gianni Infantino è definitivamain vegnida messa ad acta. Quai han communitgà ils dus procuraturs publics generals extraordinaris ch’èn sa fatschentads cun il cas. Concret èsi ì per la renfatscha da violaziun dal secret d’uffizi e pervi da favurisaziun.
Il suspect d’avair commess in delict na saja betg sa cumprovà. Cunquai ch’ils inscunters tranter Lauber ed Infantino na sajan betg vegnids protocollads, stoppia la Procura publica generala surpigliar ina part dals custs da procedura. Lauber ha demissiunà sco procuratur public general il 2021.
Nagina instrumentalisaziun
Las retschertgas han mussà ch’ina scuntrada en il fanadur 2015 da Lauber, Arnold e dal schef da medias da la BA, André Marty, na pertutgava betg la procedura da la Fifa, mabain era l'interess dad Arnold per in post da la Procura publica federala.
Trais inscunters cun Infantino ed auters funcziunaris da ballape n'han betg surpassà remartgas generalas davart la procedura da la Fifa. La Fifa n'haja betg instrumentalisà la Procura publica federala, scrivan ils investigaders spezials.
La Fifa ha communitgà ch'Infantino haja adina agì «absolutamain correct e legal». Lauber ha adina ditg ch'el na possia betg sa regurdar dals inscunters. Finalmain ha el stuì demissiunar il 2020 pervi da las eventualas malgistadads en la procedura cunter la Fifa.