Svizras e Svizzers han immatriculà danov 29'100 vehichels il fanadur. Quai munta 14% damain ch'il fanadur da l'onn passà, scriva l'Uffizi federal per statistica. Surtut autos da diesel n'èn betg stads tschertgads. Cumpareglià cun l'onn passà èsi 50% pli paucas immatriculaziuns.
Immatriculaziuns novas d'autos da persunas en CH
Boom d'autos electrics ed ibrids
Il dumber dals autos electrics immatriculads da nov è percunter creschì marcantamain per 85% il fanadur. Era autos ibrids vegnan cumprads dapli – quai tant tar ils ibrids regulars cun sustegn electric (+63%), sco tar ils uschenumnads ibrids «plug-in» (+48%) cun ina battaria pli gronda.