Cun la schluccada da la situaziun da corona dastgassan las finanzas publicas en Svizra sa normalisar l’onn current. L’administraziun federala da finanzas (EFV) quinta cun in surpli da var 3 milliardas francs tar la Confederaziun, ils chantuns, las vischnancas e las assicuranzas socialas. Quai mussan las cifras che l'EFV ha publitgà mardi. Tut en tut ha il stadi gì ils onns 2020 e 2021 expensas da var 34 milliardas francs per dumagnar la pandemia da corona.
Sulet il 2020 saja il deficit stà 21 milliardas. Quai correspunda a 3% dal product interiur brut. Er per l’onn 2021 quinta l'EFV cun ina gronda chargia per las finanzas publicas. Il deficit vegnia probablamain a muntar a 0,7% dal product interiur brut. In motiv per ils deficits èn stads – sper las expensas per l’indemnisaziun per lavur reducida, per la cumpensaziun dal gudogn da corona e per ils agids per cas da direzza – er entradas da taglia pli pitschnas.
Restabiliment tar las entradas da taglia
L’onn current dastgassan – tenor la prognosa – las entradas da taglia en spezial dals chantuns e da las vischnancas puspè crescher. Ina part essenziala dal svilup positiv han er las distribuziuns supplementaras da la Banca naziunala svizra.
Il surpli da 3 milliardas francs prognostitgà correspunda a circa 0,4% dal product interiur brut. Tenor l’EFV vegnan ils debits dal stadi dentant a s’augmentar anc ina giada l’onn 2022. Per l’onn 2023 spetga l'EFV ina midada da tendenza. I dettia dentant vinavant ristgas per las finanzas publicas. Latiers tutgian per exempel la guerra en l'Ucraina, pretschs creschents u la valurisaziun dal franc.
