Cun reprender damaun l'urari, rinforzan las Viafiers federalas il nettegiar ils trens e las staziuns. Tenor communicaziun vegnan enturn 1'000 persunas a nettegiar ils trens, per part schizunt durant il viadi. A las staziuns s'occupan ils teams da nettegiar pli fitg cun dischinfectar surfatschas da contact sco pusals, tschabargals ed automats. Quels vegnan nettegiads da nov 6 giadas a di enstagl da 3 sco enfin qua. Ultra da quai vegn era nettegià durant la notg: lura oravant tut ils palantschieus e las fanestras. Ed ina giada l'emna vegn nettegià intensiv en l'interiur e l'exteriur.
Mascras d'igiena
Las Viafiers federalas recumondan da purtar mascras d'igiena en ils trens sch'ins na po betg tegnair en la distanza da dus meters. Las mascras d'igiena possian ins cumprar a las staziuns, tranter auter en kioscs ed apotecas. Ma era en ils automats da Selecta datti las mascras d'igiena.