La petiziun è vegnida lantschada d'ina persuna privata, Notburga Klett. Tenor ella negligeschia la Confederaziun sias obligaziuns tar la prevenziun en dumondas da sanadad e tar la protecziun da l'ambient.
Las consequenzas da las radiaziuns na sajan betg scleridas avunda. Perquai na dastgian las interpresas da communicaziun betg installar novs emetturs e novas antennas.
Co vinavant cun la petiziun?
Tge che capita cun la petiziun n'è betg cler. L'artitgel 33 da la constituziun federala di, che las autoritads stoppian prender enconuschientscha dad ina petiziun. Ellas n'èn però betg obligadas da tractar quella u da respunder a quella. En la pratica vegn quai però quasi adina fatg.
Iniziativa è gia inoltrada
Il tema 5G polarisescha gia dapi pli ditg. Da curt èsi gia vegnì inoltrà ina iniziativa dal pievel cun il titel «Per in telefonin che tegnia quint da la sanadad e da l'effizienzia da l'energia» . Cun quella vulan ils iniziants ch'i vegnia francà en la constituziun ch'il pievel vegnia protegì meglier da radiaziun electromagnetica.
In rapport da l'uffizi federal per l'ambient davart il svilup da la tecnologia da 5G e las ristgas da sanadad ch'èn cumbinadas cun quella vegn anc spetgà fin la fin da l'onn.
Opposiziun cunter 5G er en il Grischun
Resistenza encunter la nova tecnologia datti er en il Grischun. A Rueun era vegnì inoltrà ina petiziun encunter ina tala antenna sur vischnanca.
Il tema 5G divida però er ulteriuras vischnancas grischunas.
RR novitads 16:00