La notg passada è stà la pli fraida ch'è fin ussa vegnida mesirada quest enviern en Svizra. A Samedan ha il termometer mussà -22,8 grads celsius. A La Brévine en il chantun Neuchatel è la temperatura crudada sin -25 grads, sco SRF Meteo scriva via la plattafurma X.
Main fraid èsi stà a Glion, cun circa -4,5 grads tenor Meteosuisse.admin.ch. A Scuol èsi stà circa -11,5 grads, a Savognin circa -11 grads.
Il pli fraid èsi stà questa notg tar uschenumnads lais d'aria fraida. En quests lieus resta l'aria fraida bloccada pervia da la topografia. Tar il Sägistalsee en il chantun Berna èsi uschia per exempel vegnì mesirà minus 34,6 grads.
Oz crescha la temperatura sin minus 2 grads en l'Engiadina e plus 2 a Cuira.