En Svizra datti bainbaud ina nova federaziun tetgala da las cassas da malsauns. Las 13 grondas cassas da malsauns svizras han annunzià da fundar ina tala che duai cumenzar sia lavur l'entschatta da l'onn proxim e da sortir da las existentas Santésuisse e Curafutura. La finamira saja che la branscha da las assicuranzas cuntanschia dapli paisa, hai num en ina communicaziun – e quai en l'avegnir cun mo ina vuscha communabla.
Actualmain datti las duas federaziuns Santésuisse e Curafutura. Tranter las duas federaziuns hai dentant adina puspè dà dispittas, per exempel davart sistems da tariffas. Quai haja per part indeblida la posiziun da las cassas da malsauns.
Reacziuns differentas
Santésuisse e la federaziun dals medis svizzers FMH beneventan la fundaziun d'ina suletta federaziun da cassas da malsauns. Per Santésuisse saja impurtant che la branscha discurria puspè cun ina vusch, ha ditg la directura Verena Nold a l'agentura da novitads Keystone-SDA. La segunda federaziun ch'exista il mument, Curafutura, ha communitgà ch'ella prendia per enconuschientscha la fundaziun. La Federaziun dals medis e da las medias svizras è surpraisa dal svilup e sincerescha da vulair colavurar cun la nova federaziun da las cassas da malsauns.
Per l'Uffizi federal da sanadad saja interessant da pudair discuttar cun in ferm partenadi. Tge effect che la nova federaziun vegnia ad avair sin discussiuns actualas, stoppian ins dentant anc analisar.