I saja stà legal da sajettar il luf il schaner, scriva l'Uffizi federal d'ambient BAFU sin dumonda dal schurnal regiunal da radio SRF. Il chantun Grischun haja furnì la documentaziun necessaria e quella haja l'uffizi analisà.
La surveglianza da chatscha aveva observà plirs inscunters dal luf singul cun persunas. Pliras emprovas da spaventar l'animal n'avevan betg purtà success, uschia ch'il chantun ha decis da sajettar el – senza lubientscha da Berna.
Nagina lescha federala – chantun ha maun liber
Per sajettar in luf singul na dettia nagina perscripziun specifica en la lescha federala. Là saja be lubì da sajettar animals che fetschien «donns considerabels» – co reagir en cas che carstgauns sajan pereclitads na saja dentant betg reglà. Quai scriva l'uffizi en sia resposta. E cunquai ch'ina perscripziun federala manchia, possian ils chantuns agir a moda independenta e far diever da la «clausula generala da polizia».
Ch'il chantun veglia sa referir sin questa clausula aveva il cusseglier guvernativ Mario Cavigelli annunzià gia la stad passada. Il luf sajettà en la Cadi quest enviern è dentant stà l'emprima giada ch'il chantun ha decis dad ir questa via.
Conferma è in levgiament
La conferma che quest agir saja stà correct, saja in levgiament che fetschia plaschair, ha ditg Mario Cavigelli. Ins vegnia puspè a far diever da questa pussaivladad sch'i dettia anc ina giada ina tala situaziun. Quai na muntia dentant betg ch'ins possia en l'avegnir simplamain duvrar quest instrument per regular la populaziun da lufs, uschia Cavigelli vinavant. I dovria en mintga cas p. ex. in privel da vita urgent per carstgauns ch'ins na possia betg eliminar auter, avant che far diever da la «clausula generala da polizia».
Sustegn per l'agir dal chantun gia avant la conferma da Berna
Tant las organisaziuns d'ambient WWF e Pro Natura sco er l'uniun purila dal Grischun han gia curt suenter che la surveglianza da chatscha aveva sajettà il luf, mussà encletga per l'agir. Bain na duessia quai betg daventar regla en connex cun la regulaziun da lufs. Ma tuts han sustegnì ch'il chantun ha fatg diever da questa pussaivladad en la situaziun sisum la Surselva. E quai anc avant che l'Uffizi federal per l'ambient aveva piglià posiziun.
