Il «Skeacher» è in scolast u ina scolasta da skis che spetga gia sisum la pista e ch'ils giasts pon «empustar / reservar» spontanamain. Davos il project stattan las scolas da skis ensemen cun Grischun Vacanzas. Ensemen cun il giast vegnan il stil e la moda e maniera dad ir cun skis analisads ed optimads entaifer ina u duas rundas sin pista. Sche quai è giavischà po il skiunz u la skiunza era anc pigliar in'ura instrucziun privata. L'innovaziun vi da la purschida è ch'il giast po profitar a moda simpla e nuncumplitgada da l'instrucziun da scolastas e scolasts da skis e che las scolas da skis han il medem mument ina nova pussaivladad da gudagnar clientella.
Giuria: «Stgaffì in product per ina dumonda latenta»
L'argumentaziun da la giuria ch'il premi va als «Skeachers»: Ils fundaturs hajan vesì ina dumonda che saja avant maun e sviluppà in product per quella. La purschida dettia a las scolas da skis dapli preschientscha sin las pistas e garanteschia cun ils scolasts e las scolastas professiunalas il medem temp er buna qualitad. Perquai ch'i saja uschè simpel da pigliar spontanamain in scolast u ina scolasta possian ins era cuntanscher persunas che veglian bain ina curta instrucziun ma na giessan mai en la scola da skis. Uschia gudognia il sport d'enviern attractivitad.
Ord l'archiv
Il 2002 ha l'anteriur manader da fatschenta da l'Arena Alva survegnì l'emprim premi Milestone. Quai per il project «Riders Palace».