Las bleras vischnancas Grischunas dumandadas quintan cun ina pli auta participaziun da votar che usità. Per exempel a Tavau quinta il chanzlist Michael Straub cun ina participaziun da radund 55% – quai èn circa 10% dapli che uschiglio. Fin mesemna avevan numnadamain passà 37% gia dà giu la vusch. Ina pli auta participaziun da votar sa mussa tranter auter er tar las vuschs nunvalaivlas. Tavau controllescha numnadamain gia uss sche l'attest da votar è avant maun e suttascrit. Tar votaziuns cun ina auta participaziun dettia per ordinari pli bleras vusch nunvalaivlas perquai ch'er persunas che n'èn betg uschè disadas da votar van a votar, uschia Michael Straub.
Nus avain gia uss dapli vuschs nunvalaivlas che tar la davosa votaziun il settember. Ed uschia vesan ins che la participaziun è pli auta, perquai che pli blers che n'èn betg disads van a l'urna.
Sumegliant guarda quai er or a Landquart, là avevan fin mesemna 35% gia da giu lav vusch ed il chanzlist Florian Niggli è persvas ch'ins vegnia segiramain sur 40% fin la dumengia. Autras vischnancas sco per exempel San Murezzan u Cuira avevan gia la mesemna cuntaschì passa 40%. Auter guarda quai or en Lumnezia, là han be radund 27% gia votà. Fin dumengia quinta il responsabel Giusep Capeder dentant cun 45% fin 50% participaziun. Er cun dapli che 50% quinta il chanzlist da Domat Lucas Collenberg. Cun ina pli auta participaziun quintan er Mustér, Surses e Glion – prognosas na vulan ils responsabels dentant betg far.