La regenza grischuna è pronta d'introducir en il chantun la vegliadetgna da votar da 16 onns. Malgrà ch'ella saja in pau sceptica, renconuschia ella il vast sustegn politic per la dumonda en il Cussegl grond. Il favrer era la pretensiun per il dretg da votar e d'eleger a la vegliadetgna da 16 onns vegnida inoltrada en il Cussegl grond. Suttascrit avevan 75 da las 120 deputadas e deputads, da tuttas fracziuns. Il dretg da votar e d'eleger valiss per fatschentas communalas e chantunalas.
Regenza grischuna sa mussa indecis
En la resposta sin la pretensiun sa mussa la regenza indecis. La vegliadetgna da votar da 16 onns saja vegnida refusada pir ils onns 2007 e 2009 dal Cussegl grond e 2016 e 2019 da la regenza grischuna.
La situaziun oz na saja betg propi autra, accentuescha l'executiva. Cun la vegliadetgna da votar da 16 onns possia er dar problems, perquai che la maiorennitad tenor dretg civil divergeschia da la maiorennitad politica. En pli vegnia creà ina barriera da vegliadetgna per il activ e passiv dretg d'eleger.
Sin l'autra vart saja il sustegn politic per quest giavisch en il Grischun creschì, scriva l'executiva. Ella renconuscha il grond sustegn politic per il giavisch en il Cussegl grond. Perquai e pervia da ulteriuras discussiuns en auters chantuns ed era sin il livel federal, na veglia l'executiva betg refusar quest giavisch.
