Novitads dals 22-01-2025 - Ospitals na vulan betg 100 milliuns da la regenza

• Per garantir il provediment da sanadad decentral ha la regenza grischuna vulì metter a disposiziun in credit d’impegn da 100 milliuns francs. Suenter la fasa da consultaziun è ussa cler: Ils ospitals e las organisaziuns purtadras n’han nagin interess vi da quests daners, ch’ins avess stuì pajar enavos. Ospitals ch'avessan vulì in emprest, avessan stuì suttametter a la regenza in plan da mesiras e preschentar en spezial, co ch'i resulta a curta fin a media vista puspè in resultat da gestiun positiv.

• L'hotel da trais stailas e mez «La Siala» a Falera vegn serrà definitivamain suenter la stagiun actuala d'enviern la fin da mars 2025. Quai ha l'hotel communitgà oz. La decisiun saja vegnida prendida suenter in'expertisa professiunala externa. Il svilup economic dals ultims onns haja mussà ch'il manaschi d'hotel na saja betg pli rentabel. Cunzunt la stagiun da stad saja stada ina sfida. Il cussegl d'administraziun da l'hotel planiseschia perquai ina midada d'utilisaziun. Ils concrets pass vegnian definids en coordinaziun cun la vischnanca. Cun l'hotel «La Siala» serra a Falera uschia il davos e sulet hotel dal vitg.

• Il giugader dal HCD Marc Wieser terminescha sia carriera questa stad. Quai ha l'attatgader da 37 onns communitgà sur las medias socialas dal club. Avant 20 onns ha Wieser cumenzà sia carriera en la National League. Cun excepziun da trais onns tar Bienna, ha Wieser adina giugà per il HCD. Cun Tavau ha el gudagnà quatter titels da campiun, sco er la Cuppa Spengler 2023.

Il di en survista