Da Silvester ha la polizia ed ils pumpiers gì da far en il Grischun sco era en la Svizra:
- A Pany en il Partenz ha ars la notg passada ina chasa da vacanzas, ils quatter abitants han pudì bandunar la chasa. Igl ha dà in grond donn material, ha communitgà la polizia chantunala. Curt suenter mesanotg hajan ins survegnì l'annunzia dal fieu. En acziun èn stads ils pumpiers dal Partenz Central e da Claustra.
- A Landquart ha cumenzà ad arder in pignol da Nadal ier saira, la raschun è ina chandaila, ha communitgà la polizia chantunala. Ils dus abitants, in um da 71 onns e sia partenaria da 62 onns han pudì stizzar sez il fieu, tuttina han ins stuì transportar els en l'ospital perquai ch'igl ha dà bler fim pervi dal fieu.
- Ils pumpiers da la citad da Cuira èn stads en acziun la notg passada en connex cun fieu artifizial en ils quartiers d'abitar. Els han stuì stizzar il cuntegn d'in moloc perquai che persunas han dismess inattentiv fieu artifizial ch'era anc chaud.
- A Rorschacherberg en il chantun Son Gagl ha in um da 36 onns siglientà davent ses bratsch sut, quai ha communitgà la Polizia chantunala songagliaisa. L’um haja traffitgà cun fieu artifizial ch’el haja zambregià sez.
- A Zufikon en il chantun Argovia haja piglià fieu in auto da sport en ina halla da parcar. En consequenza sajan passa 70 ulteriurs autos parcads vegnids donnegiads.
En ses pled da Bumaun ha la presidenta da la Confederaziun Karin Keller-Sutter accentuà l'impurtanza da cumpromiss en la politica svizra. Ins stoppia esser pront dad era tadlar auters puncts da vista e da far concessiuns. Ultra da quai ston ins tenor Keller-Sutter era esser modests.
Almain 10 persunas èn mortas e 35 persunas vegnidas blessadas tar ina charrada d'amoc a New Orleans , communitgescha l'administraziun municipala. Il manischunz è mort durant la sajettada ch'igl ha dà cun la polizia. Davart sia identitad u era ils motivs per ses agir na datti il mument naginas indicaziuns. La polizia federala FBI discurra uss era d'in act da terrorissem.
La survista dal di cun las pli impurtantas novitads per tadlar curt e cumpact.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
La survista dal di:
Themen in diesem Newsticker
- Alphaville na vul betg che AfD dovra sias chanzuns
- Gregor Deschwanden vegn segund en siglir cun skis da Bumaun
- A New Orleans è in auto charrà en ina fulla da glieud
- Astrid Öyre Slind gudogna quarta etappa da la Tour de Ski
- Pignol ha brischà a Landquart
- Pled da Bumaun: Esser modest e tadlar auter puncts da vista
- Tour de ski: Amundsen gudogna quarta etappa
- Silvester: autos brischads ed accidents cun fieu artifizial
- Intginas pitschnas acziuns per pumpiers a Cuira
- En il Partenz ha ina chasa da vacanzas brischà