Gia il 2016 era crudada la decisiun da schlargiar las capacitads da producziun a Zezras. Il 2021 aveva la construcziun lura cumenzà. La halla da producziun moderna duai er augmentar la productivitad, grazia ad adina dapli automats. Uss – trais onns da construcziun ed 80 milliuns francs pli tard – è la nova halla da producziun averta.
Da schlargiar il bajetg a Zezras saja dentant er in mussament per l'economia grischuna. Tuttina dettia qua er sfidas. Dals actualmain 240 collavuraturas e collavuraturs èn var la mesadad persunas cun scolaziun spezialisada. Uschia saja difficil da chattar per tut avunda glieud. La firma tschertga per part er en il Liechtenstein ubain en il Vorarlberg.
Nus tschertgain plitost en il sectur da l'IT u da la communicaziun. Sco inschigners chattain nus fitg buns collavuraturs al lieu.
55 inschigners ed inschigneras sviluppan maschinas e roboters. In da quels è Ricardo Demarmels. Dapi trais onns lavura el a Zezras ed ha uschia pudì turnar en il Grischun.
L'abitar en Surses è stà per mai la prioritad nr. 1. D'avair chattà ina plazza da lavur en il Grischun nua che jau hai emprendì e che plascha è in luxus.
In'Investiziun allegraivla è il project da l'Integra er per il Grischun. Il minister d'economia, Marcus Caduff, vesa surtut las cundiziuns da basa sco punct central per ch'il Grischun sappia concurrenzar cun auters lieus. I dettia cundiziuns spezialas, era sch'el na tradescha betg quellas.
