L'aviatica militara haja intensivà la surveglianza dal spazi aviatic, communitgescha il Departament federal da defensiun. Per la segirezza en il spazi aviatic sur Tavau procuran radars, aviuns da cumbat ed ina defensiun cunter aviuns a terra. Durant il temp da conferenzas patruglieschan permanentamain aviuns da cumbat armads.
Il 50avel Forum mundial d'economia è dals 21 fin ils 24 da schaner. A partir dals 20 fin ils 25 da schaner vegn restrenschì il traffic aviatic en la vischinanza da Tavau, tut ils sgols dovran in permiss.
Visitaders dal WEF pon er quest onn atterrar a Dübendorf e lura viagiar vinavant, suenter controllas da persunas, cun helicopters privats u sin via a Tavau.
Grischun è responsabel
Il parlament federal ha limità il dumber da schuldads sin 5'000. Be ina part da quels vegnan en acziun a Tavau. Auters protegian indrizs d'infrastructura ordaifer Tavau e prestan lavur logistica e sustegnan la direcziun.
La responsabladad han las autoritads civilas dal chantun Grischun, cun excepziun dal spazi aviatic, lezza responsabladad ha l'aviatica militara svizra. Il schef da tut è il cumandant da la Polizia chantunala grischuna, Walter Schlegel.
Al 50avel WEF spetgan ils organisaturs enturn 3'000 giasts. Ils custs da segirtad muntan er quest onn a radund 9 milliuns francs.
Ord l'archiv:
RTR novitads 14:00