Ina mamma che sa chatta en las stretgas suenter ina naschientscha – duai empè da retrair contribuziuns da maternitad dal chantun dumandar agid social.
Spustar custs d'ina cassa a l'autra
Empè da la cassa chantunala vegn il sustegn rembursà da la cassa communala. I na sa tractia betg d'in spustament da custs a disfavur da las vischnancas, stat scrit en il carnet da votaziun.
Il chantun surpiglia ina part dals custs entras la gulivaziun da finanzas. Plinavant sa participeschia il chantun als custs da canorta dad uffants da quatter onns.
Las vischnancas èn las perdidras da quest project
La citad da Cuira stoppia sustegnair cira 20 fin 30 mammas dapli ad onn, sch'il suveran ditgia Gea da stritgar las contribuziuns da maternitad, di Patrik Degiacomi, cau dal socialesser da la citad da Cuira.
El discurra d'ina uschènumnada «Mogelpackung». Ins prendia davent a las famiglias paupras daners. Suenter repartian ins intginas brustgas sin las canortas. Las canortas retschaivian be pitschens imports entras quest project da votaziun, di Patrik Degiacomi. Quests daners na gidian betg las canortas.