Sche tut è be anc turbel u «Retinis pigmentosa». Riccardo Hendry ha 35 onns ed è da Mustér. Dapi sia naschientscha ha el la malsogna d'egls «Retinis pigmentosa». Quella fa ch'ils egls vesan cun il temp adina pli mal, ch'ins survegn ina vista da tunnel (ins vesa adina pli pauc da las varts e sutvart) e ch'ils egls han problems da vesair chaussas ch'èn en il stgir. Quai va uschè lunsch che la persuna vesa la fin be anc in pitschen punct u schizunt nagut pli. Tenor las prognosas tar Riccardo duai quai esser il cas tar el cun enturn 60 onns.
Survegnì gia baud ina schanza
Il mument lavura Riccardo Hendry anc 100% tar ina firma da fabricaziun a Mustér. Là ha el era gia fatg ses emprendissadi sco logisticher. Heinrich Berther, da lez temp patrun da la firma, saja stà il sulet che haja dà ad el la schanza d'insumma survegnir ina plazza d'emprendissadi. Uschia haja era lez recumandà ad el da far sco emprim in onn a la scola da tschorvs a Basilea e da cumenzar pir suenter cun l'emprendissadi tar el. Uschia haja el pudì far gia a Basilea in pèr chaussas da la scolaziun ed uschia gì in zic pli simpel durant l'emprendissadi. Che Riccardo po insumma lavurar en in pensum da 100% è cun sia malsogna ina gronda excepziun. Ad el saja adina puspè vegnì ditg, che quai na saja betg pussibel. Entant èn las consequenzas da la malsogna uschè fermas, ch'el na sa betg quant ditg ch'el po anc lavurar vinavant. «Forsa anc tschintg onns, forsa anc diesch», manegia Riccardo Hendry.
Per el saja difficil da declerar, co ch'el vesia il mund, cun quai ch'el na sappia betg co ch'in uman saun vesia. Ma, el saja fitg da curta vista. Tut quai ch'è in zic pli lunsch davent vesa el era cun l'agid d'egliers be pli turbel. Il mument vegn lavurà vi d'ina terapia da gens che pudess franar la malsogna u schizunt puspè meglierar la vesida da Riccardo. Sche questa terapia vegn a funcziunar e sch'ella vegn alura era sin il martgà, stat dentant anc en las stailas.
Tschorv da colurs e tuttina tecnicist da glisch
Dario Neuhäusler vala sco tschorv da colurs. El na vesa però betg be alv e nair. El vesa schon colurs, ma simplamain betg uschè cler sco ina persuna senza quest impediment. Vul dir cunzunt colurs maschadadas fan difficultads ad el. Colurs intensivas èn dentant era per el nagin problem. Tar persunas ch'èn tschorvas da colurs u han ina deblezza da colurs mancan tscherts recepturs da colurs en ils egls u che quels na funcziunan betg pli. Quai vul dir, l'egl na dumogna era betg da dar vinavant l'infurmaziun da la colur al tscharvè. Quest defect è ertaivel. Cunzunt umens èn pertutgads da quai. Uschia ha bunamain mintga 10avel um difficultads cun colurs. Ils ins pli ferm, ils auters pli pauc.
Dario Neuhäusler lavura sco manader da project d'events tar Arosa Turissem. Dasperas fa el per numerusas bands la glisch durant ils concerts. Uschia per exempel era per Breitbild a l'Open Air Lumnezia. El saja engraziaivel, ch'el survegnia, malgrà sia difficultad cun colurs, la fiduzia dals artists e da las artistas da pudair far la glisch.
Era sch'el na vesa betg adina cleramain tut las colurs, ha Dario chattà vias da pudair identifitgar las colurs. «Tut quai che vesa ora sco il tschiel è blau. Ed autras colurs hai jau simplamain emprais, ch’ins numna quellas uschia.»
Per Dario è sia deblezza da colurs normalmain betg in problem en il mintgadi. Cler, tschertas chaussas sajan pli difficilas da far. E jobs sco pilot u chauffeur da bus na possia el halt betg far. Ma uschiglio saja bler sco tar tut ils auters era.