Ils accents dal program da regenza en survista
- transfurmaziun digitala
- meglierar las cundiziuns per viver e lavurar
- augmentar l'attractivitad dal chantun
- Green deal sco resposta da la midada dal clima
Sco emprima gronda sfida che fatschenta ils proxims onns ha Peter Peyer, president da la regenza grischuna, menziunà la transfurmaziun digitala. 35 milliuns francs investescha il chantun ils proxims onns en la strategia per l'administraziun digitala. Profitar duai la populaziun e l'economia per exempel cura ch'ella ha da communitgar en ina furma u l'autra cun l'administraziun chantunala.
En pli vul il chantun rinforzar la plazza economica dal Grischun. Tranter auter vul la regenza sustegnair stentas da diversifitgar il turissem che sa concentrescha uss sin ils mais d'enviern. In egl attent vul la regenza er avair sin la mancanza da persunal che pertutgia fertant tut las branschas. Tranter auter vul la regenza porscher ina vasta purschida da furmaziun. Glieud giuvna duai pudair sa scolar en Grischun e suenter er restar e lavurar en Grischun. Part da quellas stentas fa er l'edifizi nov da la Scola auta spezialisada dal Grischun (FHGR) che custa 178 milliuns francs e ch'il suveran ha approvà quest onn.
Per promover l'attractivitad dal chantun prevesa la regenza bleras diversas mesiras che pertutgan differents secturs: Rinforzar il traffic public, la purschida da scolaziuns e furmaziuns, la purschida dal sectur da sanadad u ina purschida culturala diversa. Per esser attractiv stoppia il chantun er promover la cumpatibilitad da professiun e famiglia, accentuescha il president da la regenza.
Cunquai ch'il Grischun saja ferm dependent dal turissem d'enviern, sentian ins er ferm las consequenzas da la midada dal clima, ha cussegliera guvernativa Carmelia Maissen ditg a la conferenza da medias. En quest connex haja il Grischun però il potenzial d'agir sco exempel per auters. Gist tge che pertutga energias regenerablas – cunzunt la forza idraulica – dettia grondas schanzas che duain vegnir nizzegiadas meglier.
Plan da far pli gronds deficits
Il program da regenza per ils onns 2025 fin 2028 è vast – e custa avunda. Raschun avunda da dumandar il minister da finanzas Martin Bühler sche las finanzas dal chantun lubescha da realisar il program previs. «Gea», di Bühler. Cun las finanzas dal chantun guardia quai ora bain. Concret ha il chantun da la vart passa 700 milliuns francs. La buna basa da l’agen chapital vul il chantun nizzegiar per realisar il program da regenza. A media vista van las expertas ed ils experts da finanzas però da quai anora ch'il chantun fa onn per onn gronds deficits. Concret prevesa il plan da finanzas 2025-2028 deficits da fin 150 milliuns francs. Uss dastgan ils deficits betg surpassar la limita da 50 milliuns francs, tge che duai sa midar.
Ils deficits pli auts derivan tenor la regenza, tranter auter da la gulivaziun da finanzas naziunala che porta ils proxims onns damain contribuziuns al chantun. E lura èn las contribuziuns or dals gudogns da la Banca naziunala svizra fitg intschertas.
Tuttina vul il chantun avair vinavant avunda segirezza: La summa ch'il chantun ha da la vart na duai betg crudar sut 300 milliuns francs. Uschiglio saja puspè da trair en la struva.
Cun ils plans da finanzas dal chantun sto sco proxim il Cussegl grond sa fatschentar.