A Claustra vegn il suveran a decider davart l’iniziativa che vul intercurir ils affars da l’administraziun, pia schebain ins duai prender sut la marella la gestiun da las finanzas da las autoritads communalas. Quai ha decis la gievgia il cussegl communal, malgrà ch’ina expertisa giuridica aveva taxà l’iniziativa sco probabel illegala.
L’iniziativa vul che las finanzas da la vischnanca e las indemnisaziuns per las autoritads vegnan intercuridas dad in post imparzial. Er la fluctuaziun tar il persunal duai vegnir prendida sut la marella. Schebain i dovra quella examinaziun administrativa decida il suveran da Claustra ils 29 da november.
Nagut da zuppentar
In dals arguments principals en il cussegl communal saja stà, ch'ins na veglia betg derasar l'impressiun ch'ins haja da zuppentar insatge. Quai ha ditg il chanzlist communal, Michael Fischer, sin dumonda dal Schurnal regiunal da SRF. Impurtant per la decisiun sajan dentant er las bleras suttascripziuns stadas. 150 avessan fatg da basegn, vegnidas ensemen èn la finala 278.
L'iniziativa è in cler votum da disfidanza cunter las autoritads communalas. E quai n'è betg l'unic. Pir avant duas emnas n'ha il suveran da Claustra betg reelegì il president communal en uffizi, Kurt Steck.