Tar Ringier ha il nov directur lavurà a moda intensiva vid la transfurmaziun digitala. Quai è tenor Vincent Augustin betg mo fitg impurtant per RTR, mabain per l’entira SSR, cunquai ch’il directur RTR ha era part da la direcziun generala da la SSR. Quai saja, surtut tar RTR, fitg impurtant per era cuntanscher ils consuments giuvens.
Nus stuain far programs e cuntegns cun ils quals nus cuntanschain la giuventetgna.
Plinavant haja Nicolas Pernet blera experientscha en il marketing e la vendita, di Vincent Augustin. Era quai è tenor Vincent Augustin stà in impurtant criteri. Il nov directur sappia co ins possia generar novs meds finanzials. Da questa experientscha possia surtut la SSR profitar.
Idiom e derivanza n’han betg giugà ina rolla
Nicolas Pernet haja ademplì ils criteris d’experientscha. La derivanza ni era l’idiom n'haja tenor Augustin betg giugà ina rolla. Els avessan gugent preschentà ina dunna sco successura da Ladina Heimgartner. Els hajan dentant decidì tenor tut ils criteris definids e quels haja Nicolas Pernet ademplì il meglier.