En l’entira Svizra han var 5’000 persunas profità da la cussegliaziun professiunala, da studi u da carriera «Viamia», dapi l’entschatta 2022. En il Grischun han radund 130 persunas nizzegià la spierta, che sa drizza a glieud da 40 onns ensi.
Per trair in emprim facit hai uss dà in’enquista naziunala. A quella sajan sa participadas 36 persunas dal Grischun, communitgescha l’Uffizi chantunal per la furmaziun professiunala. Quellas hajan valità la lavur da las cussegliadras e dals cussegliaders sco fitg buna. E las pli bleras persunas vegnissan a recumandar la spierta.
Viamia vul dar sin via ideas ed inputs
Las pli bleras persunas che laschian far l'analisa vulan simplamain savair tge pussaivladads ch'i dess anc e nua che lur via pudess anc ir, declera Petra Wyss la responsabla per las cussegliaziuns da Viamia en Grischun.
Finamira è che tantas persunas sco pussaivel laschan far in'analisa da la situaziun professiunala per chattar ora sch'i èn al dretg lieu. U dessi forsa anc autras variantas.
L'analisa da la situaziun vegn fatga sco emprim online, suenter vegn guardà sin il curs da la vita e sin l'experientscha che las persunas han – er dasper la professiun, forsa en lur hobis. Uschia vulan ins chattar ora nua ch'ils interess e las fermezzas èn. Fitg bleras persunas na sajan betg pertschertas da quai. Viamia vul precis là gidar la clientella d'avair ina survista da lur satgados e dar inputs en tge direcziun che lur via pudess ir vinavant.