Granella, malsognas e drosofila han dà da patratgar als purs e puras da vin quest onn. Il schurnal regiunal dad SRF ha discurrì cun divers possessurs e possessuras da vignas en il Signuradi. Per exempel Irène Grünenfelder che cultivescha ina vigna a Jenins ha betg bellas ivas.
Igl è stà in onn fitg grev, nossas ivas avevan in'infecziun e nus a Jenins avevan trais giadas granella.
En pli haja dà lungas periodas sitgas e lungas bletschas. Il cummissari da viticultura dal Grischun Walter Fromm di er, che las vischnancas Maiavilla, Jenins e Malans eran pliras giadas pertutgadas da la granella. Las vischnancas Fläsch, Zezras, Igis e Trimmis avevan dapli fortuna cun l’aura e pli pauca granella. Thomas Marugg, ch'ha ina vigna a Fläsch po uschia discurrer d'ina buna vendemia.
Nus avain gì in bel onn da vendemia. Cun la perioda chauda avain pudì racoltar pli baud ed essan uschia schon bainbaud a fin.
Tenor Walter Fromm èsi quest onn tant pli impurtant da selecziunar bain las ivas, e pia mo metter en las harassas las ivas saunas. Pervia da questa selecziun haja dà 10 enfin 20% pli paucas ivas blauas, questas per il vin cotschen. Da las ivas alvas, per il vin alv, haja dà medem bleras sco l’onn passà.
