Giuven e vegl, pign e grond, da lunsch e datiers – radund vegn persunas han raccoltà ivas sin las parcellas da la famiglia Lipp a l'ur da Maiavilla. La vendemia saja mintg'onn in eveniment spezial, raquintan gidantras e gidanters:
Per mai è quai fitg meditativ ed i dat era in'autra relaziun tar il product final.
Raccoltar n'è betg lavurar. Quai è plaschair e remuneraziun.
![Ina sentupada da generaziuns – pitschen e grond gidan cun.](https://www.rtr.ch/static/cms/images/960w/078b53e.jpg)
Qualitad constat – quantitad betg
En cumparegliaziun cun la media dals davos onns quinta Carina Lipp cun 30-40% pli pauca racolta. Igl avess dentant anc pudì esser dapli:
En cumparegliaziun cun autras parcellas en il Signuradi n'avain nus betg gì donns da granella e pauca furmaziun da glatsch
La buna primavaira haja l'entschatta anc sugerì ch'i vegn tar in bun onn. Las bassas temperaturas il zercladur han dentant fatg che las ivas n'èn betg fluridas uschia sco giavischà. Cun la qualitad è la viticultura dentant fitg cuntenta.
![tractor oransch cun bler glieud enturn](https://www.rtr.ch/static/cms/images/960w/0d0e66.jpg)
Fin ch'il vin è qua, vai anc in amen...
La lavur sin il funs è ida a fin il davos venderdi. Las davosas ivas nairas ed ivas alvas èn sut tetg. La lavur per in bun vin 2020 cumenza dentant pir da dretg, uss en il tschaler. Ma almain stoppian ins uss betg pli guardar trasora sin la prognosa da l'aura, di la viticultura da Maiavilla cun in surrir.
![iva alvas](https://www.rtr.ch/static/cms/images/960w/470e26.jpg)