I saja stà ina saira d’infurmaziun interessanta cun bleras vuschs positivas ed era in per vuschs criticas, di Fabrizio Keller. «A Rossa è ina gronda part a favur dal project, impurtant è era il sustegn da las autoritads politicas localas. E nus avain constatà che betg mo la populaziun locala, mabain era ils turists che frequentan la zona han in interess vi dal parc, e quai fa grond plaschair», uschia il president da l'Uniun Parc Adula. Da la vart dals critichers (che vegniva da la Val Blegn, la red.), haja quai dà nagins arguments novs, quels ch’èn encunter sajan encunter pervi da tschertas restricziuns en la zona da coc, auters na veglian nagins novs turists ed i dettia era temas per l’agricultura e la vendita da la tala, ha ditg Fabrizio Keller.
En tschintg emnas vegn votà
Ils 27 da november voteschan 17 vischnancas dal Grischun e dal Tessin, sche vulan far part al Parc Adula. Il contract vala per diesch onns, suenter po el vegnir renovà.
Las proximas sairas d’infurmaziun:
- mesemna, 19 october: Olivone
- gievgia, 20 october: Mesocco
- glindesdi, 24 october: Val
- mardi, 25 october: Vrin
- mesemna, 26 october: Sumvitg
- gievgia, 27 october: Valragn