La Punt Marlun è l’emprima colliaziun en Val Bondasca. Dapi las bovas destructivas da l'avust 2017 è la Val Bondasca zona serrada. La fin da matg, suenter in temp da planisaziun da var dus onns e mez, han ins cumenzà cun las lavurs per ina nova punt. Durant quest’emna vegn quella punt da lain montada dals maranguns.
La punt è concepida per camiuns, vul dir, ella è 4 meters largia, circa 30 meters lunga e porta passa 40 tonnas. La colliaziun en Val Bondasca è impurtanta per la vischnanca Bregaglia – cun quella pon els refar la tschiffada d’aua da baiver, far lavurs forestalas e pli tard era construir – dador la zona da privel – la senda vers la chamona dal CAS Sciora.
Era sche la Punt Marlun è ussa puspè l’emprima colliaziun en Val Bondasca – quella punt n'è betg per viandants. Ella è per entant mo per far las lavurs necessarias.