Ch’ins na veglia betg discurrer d’ina festa, ha suttastritgà la presidenta communala da la Bregaglia, Anna Giacometti. A chaschun da la bova or da la Val Bondasca, han numnadamain pers 8 persunas lur vita e numerus Bergagliots tut lur possess. Tuttina han ins vulì star ensemen per signalisar che la vita en val va vinavant, era sche tut n’è anc betg reglà e cumadà.
Eveniment sponsurà
L’occurrenza a Bondo cun finalmain bun 540 persunas, en ina tenda muntada sin ina da las novas deponias suenter la bova, n’haja betg pajà la vischnanca da Bregaglia, ha precisà Anna Giacometti. La finanziaziun da l’eveniment, cun tschaina, concert e trategniment musical suenter, hajan pussibilità sponsurs: las vischnancas da Favugn e Rüschlikon, ina fundaziun ed in donatur privat.
Turnar en val
Sper ils abitants da Bondo, Spino, Sottoponte e Promontogno èn er viagiads numerus giasts da tut la Svizra en la Val Bregaglia. Sajan quai represchentants da l’armada svizra, commembers da colonas da salvament, sco er la regenza en la persuna da Mario Cavigelli. Mintgin dad els cun regurdientschas persunalas en connex cun la catastrofa natirala dals 23 d’avust 2017 ed ils dis suandants.
Grond’impressiun m’ha fatg la solidaritad e calma dals Bergagliots a las sairadas d’infurmaziun.
Impressiun ha er fatg als blers quant bain e svelt che tut las organisaziuns communalas han reagì. Ultra da quai vegn er adina puspè numnada la solidaritad che regna en la val laterala.
Pass per pass enavos en la normalitad
Cun pleds commovents ha Manuela Filli, abitanta da Bondo, laschà repassar ils davos mais da la vita en sia famiglia en la tenda fullanada. Dapi che ella ha gì da bandunar il dachasa a Bondo, viva la famiglia a Vicosoprano. En dus mais vulan ils Fillis dentant puspè turnar «a chasa» a Bondo, ha la mamma ditg cler e persvadida. Che quel pass saja impurtant per tuts per turnar puspè en la normalitad.
-
Bild 1 von 10Legenda: La vopna da la Bregaglia. RTR Anna Caprez -
Bild 2 von 10Legenda: Anna Giacometti beneventa ils emprims giasts. RTR, Anna Caprez
-
Bild 3 von 10Legenda: A l'ur da Bondo, davos il mir cun material, s'enscuntra la glieud puspè. RTR, Anna Caprez
-
Bild 4 von 10Legenda: Las duas moderaturas da l'eveniment en il tipic costum da la val. RTR, Anna Caprez
-
Bild 5 von 10Legenda: Star da cumpagnia en la tenda cun trategniment musical. RTR, Anna Caprez
-
Bild 6 von 10Legenda: Manuela Filli sa legra da pudair turnar puspè "a chasa" a Bondo. RTR, Donatella Bonifazi
-
Bild 7 von 10Legenda: La presidenta communala Anna Giacometti lascha repassar anc ina giada ils davos mais. RTR, Donatella Bonifazi
-
Bild 8 von 10Legenda: Gino Clavuot alias Snook, ha trategnì il public cun rap rumantsch en la tenda. RTR, Donatella Bonifazi
-
Bild 9 von 10Legenda: Marcello Negrini, schef colona da salvament Val Bregaglia. RTR, Donatella Bonifaizi
-
Bild 10 von 10Legenda: Il cusseglier guvernativ Mario Cavigelli. RTR, Donatella Bonifazi
Adina cun in egl si vers la muntogna
Il batschigl da segirtad cun mirs da fin 9 meters autezza è entant puspè svidà e pront per tegnair si nov material che pudess vegnir giu dal Piz Cengalo. Ils sistems d’alarm èn en funcziun ed en cas da privel, vessan ils abitants anc d’avair temp per sa salvar, ha declerà Marcello Negrini, il schef da la gruppa da salvament en val. Dentant sa el er, che la natira è da principi betg calculabla.
RR actualitad 07:00