Il vitg da Tavau para d'esser vid. Il glindesdi bun'ura chattan ins strusch glieud sin via. Quai è bunamain il cuntrari dals auters onns. Quest onn n'è il forum mundial d'economia dentant betg a Tavau. Vinavant ha corona er in'influenza sin la stagiun d'enviern.
Che las vias èn pli vidas e ch'i n'ha betg uschè bler traffic, na disturba sco i para betg la populaziun.
Il traffic manca, nagins autos. Igl è dentant patgific.
Ch'il WEF n'è betg a Tavau disturba cunzunt las persunas pertutgadas. Ina dad ellas è Tina Heide, la directura dal hotel Grandhotel Belvedere.
Igl è mintg'onn in grond privilegi dad esser part da quella occurrenza.
Normalmain è il hotel in dals centers dal WEF – cun studios da radio e televisiun, chombras per VIPs e dapli.
Il center da congress a Tavau è anc pli vid che las vias. In'egliada en salas e corridors vids fa er mal al directur da turissem da Tavau, Reto Branschi.
Ils hotels fissan plains, las abitaziuns da vacanzas fissan plainas. Per fortuna èn almain las pendicularas e la loipa averta.
Politica internaziunala na datti il proxim temp probablamain betg en il center. Ils proxims che vegnan a discutar en quest lieu, vegnan ad esser las deputadas ed ils deputads dal Cussegl grond. Il parlament grischun s'entaupa numnadamain puspè en quel lieu.