Il contract da fusiun vala per 15 onns. Gia oz collavura Haldenstein stretg cun Cuira en ils secturs scola secundara, pumpiers, lavuratori communal e finanzas. Er suenter la fusiun restass la scola primara a Haldenstein.
La fusiun è stada dispitaivla tar ils abitants e las abitantas da Haldenstein. Las bleras discussiuns hai dà pervi da las finanzas. Ils blers aderents da la fusiun han argumentà surtut cun las investiziuns planisadas da 13 milliuns francs ils proxims onns. Per pudair finanziar quai stuessi la vischnanca auzar il pe da taglia. Il comité cunter la fusiun, la gruppa «Pro Haldenstein» ha mess en dumonda l'argument da la situaziun finanziala.
Cuira sto anc decider a l'urna
Sco quai ch'il president da la citad da Cuira Urs Marti aveva communitgà gia avant la votaziun, pudessan ils votants e las votantas da Cuira – il cas che Haldenstein approvescha il contract da fusiun – gia il favrer votar en chaussa.
RR novitads 06:00