L'atun vuleva Inventx atgnamain cumenzar a construir la nova chasa. La cumissiun da construcziun n'ha dentant betg gist dà il permiss. Lur argument: La chasa na sa fa betg en il maletg da la citad. Per survegnir il permiss han ils architects stuì far diversas adattaziuns tar il tetg. Enfin che la cumissiun da construcziun ha lura anc ina giada controllà ils plans ed ha dà il permiss, eri schon ils 16 da favrer.
Reclamaziuns, recurs e discurs
Schon bunamain dapi l'entschatta dal project han in u in pèr vischins inoltrà in recurs. Els na vulan betg, ch'Inventx construescha ina chasa davant lur nas. La cumissiun da construcziun ha lura examinà quest recurs, ha dentant ditg, ch'ils arguments dals planschiders na valan tenor els betg – il recurs vegn refusà.
Inventx ha dentant tuttina prendì si contact cun ils planschiders, uschia Roman Dinkel, l'um da marketing dad Inventx. En la discussiun vul la firma da software quietar els e chattar ina soluziun che tuts dus pon viver bain. Il problem: Enfin ils 18 da mars pon ils vischins inoltrar lur recurs tar il tribunal administrativ chantunal. Sche quai capita, vegni a durar anc ina giada in pèr mais pli ditg enfin ch'els pon cumenzar a construir.
Ils discurs na paran dentant betg dad esser simpels, propi in resultat n'han els era suenter mais betg propi, uschia l'um da marketing dad Inventx.
RR actualitad 17:00
