Il project parc Rätikon è part da la strategia da svilup da la regiun Partenz/Tavau. La mira dal project è simpla: sustegnair il svilup da la natira e la cultura da las trais regiuns cunfinantas. Co e cun tge products u servetschs n'è però anc betg cler. Entant è il project pir en la fasa preparativa. Vul dir: Ils organisaturs entran en contact cun las vischnancas per mirar, sche l’interess vid in tal project è insumma qua. Pir suenter pon els ir en la proxima fasa, in studi davart la realisabladad. En quest vegn elavurà in emprim concept grop per il parc e guardà, sche uschè in project fa insumma senn.
Entant èn las respostas positivas en il Partenz, sco er en l' Austria ed en il Principadi da Liechtenstein. Fin cha quest project vegn però propi realisà, po i durar anc insaquants onns. Il studi sez dura gia radund dus onns. Co i guarda ora suenter è grev da dir. Cunquai ch'il project è internaziunal po la planisaziun anc sa spustar marcantamain.