Resgia da Domat
La Pfeifer SA banduna Domat, il chantun ha suttascrit da curt in contract cun la firma da l’Austria per cumprar ils dretgs da construcziun. E quai per 10,8 milliuns francs. Quai vul dir, ch’il chantun decida uss tge che cura e passa sin l’areal a Domat. Planisà è da renaturalisar ina gronda part da l’areal e da far londerora ina zona d’industria. La Hamilton Plastics AG da Panaduz ha mussà interess per ina parcella da la nova zona. Ella less purtar vers 100 plazzas a Domat. Autras firmas duain suandar. Il chantun vul dentant be firmas, che portan er plazzas da lavur. Firmas che dovrian be plaz senza lavurants na veglia il chantun betg, di Eugen Arpagaus, manader da l’uffizi per industria e turissem. Il chantun na lessi er betg firmas che vegnan da las regiuns en il center.
-
Bild 1 von 3Legenda: Dapi 5 onns na vegn l'areal betg nizzegià ed è vids. RTR, H. Schär -
Bild 2 von 3Legenda: Sulet in curt temp è la resgia stada en funcziun. A. Badrutt
-
Bild 3 von 3Legenda: L'areal duai er en futur vegnir duvrà sco resgia, ma er vegnir renaturalisà. RTR, R. Müller
L’emprima giada ch’il chantun fa quai
Ch’il chantun ha insumma la pussaivladad da cumprar terren sco in interprendider è nov. Pir l’avust ha il Cussegl Grond decidi entaifer la debatta da la lescha da promover l’economia da dar a la regenza questa pussaivladad.
Betg desister d'ina resgia
L’idea d'ina resgia na vul il chantun dentant betg laschar crudar dal tut. I saja impurtant ch’il chantun haja la pussaivladad da sez elavurar lain, en cas che il svilup da l'euro e dal pretsch sa mida.
8 hectaras da l’areal a Domat èn perquai reservadas per fabritgar ina resgia. La firma Pfeifer AG ha però il dretg da bajegiar quella sco emprima. Interess haja la firma, di Eugen Arpagaus, dentant na saja betg anc cler cur che las circumstanzas economicas sa midian puspè a favur dad ina resgia.
La vischnanca burgaisa da Domat sto anc decider
Avant che tut vegn scarpa giu sto dentant la vischnanca da Domat far or da la zona da planisaziun sur l’areal ina zona d’industria. La decisiun croda ils 28 da favrer.
Ed er la vischnanca burgaisa sto anc dar l’ok. Ella è la possessura dal terren. Il president da la vischnanca burgaisa Theo Haas è dentant da buna fai, che la populaziun da Domat, schebain ils commembers da la vischnanca burgaisa sco er quels da la vischnanca politica vegnan a sustegnair il chantun. El saja leds, che insatge capiti uss, suenter che l'areal saja dapi tschintg onns vits.
Cunquai ch’i saja dentant gia suttascrit il contract cun la Pfeifer AG, quinta Eugen Arpagaus da l’uffizi cun il sustegn da la vischnanca burgaisa. Ella è la possessura dal terren.
RR novitads 14:00