In dals participants na duai betg esser sa tegnì vid las instrucziuns dal manader ed è ì en ina spunda cun naiv nova, malgrà privel da lavinas remartgabel (staglim 3 fin 5). Quai han experts da l'institut da naiv e lavinas SLF constatà en l'expertisa. Sche quai haja però propi chaschunà las lavinas, na pon ils experts betg giuditgar definitiv.
Tar la lavina dal schaner 2015 eran las persunas fin a 2.5 meters sut la naiv. En ina tschertga da 45 minutas han 30 gidanters pudì chattar tut las 8 persunas – 4 eran mortas ed in'ulteriura persuna è morta en l'ospital. Il manader da la tura, che gieva oravant sco previs en tals cas, n'era betg vegnì en la lavina.
Silsuenter ha la procura publica dal Grischun avert inquisiziuns cunter il manader da la tura. Questas inquisiziuns ha la procura publica sistì radund dus onns pli tard.
Ils plitier dad unfrendas han però recurrì tar la Dretgira chantunala cunter questa decisiun. Cun decisiun dals 12 da favrer ( SK2 17 28 ) schlia la Dretgira chantunala la decisiun da la procura publica che sto ussa reprender il cas. Il grad da responsabladad dal manader na saja betg cler avunda, uschia ch'ins na dastgia betg sistir la procedura. La procura publica ha da decider danov.
Expertisa pudess distgargiar il manader
Experts da l'institut per naiv e lavinas SLF han pudì reconstruir cun l'apparat da GPS ch'in dals commembers ha bandunà la ruta ordinada dal manader; quai che pudess avair chaschunà la lavina. Quai fissi en mintga cas da resguardar tar ina nova procedura, scriva la Dretgira chantunala.
Dumonda dispittaivla: Ir en gruppa cun distanza ubain singuls
Però era la decisiun dal manader da ir tras la spunda en gruppa cun distanza da 10-20 meters n'è betg clera. Da sclerir è tenor la Dretgira chantunala, sch'i n'avess betg dà la pussaivladad dad ir sco singuls da la spunda giu. Grev da cumprovar vegn ad esser che quai avess midà la situaziun – pia ch'i avess uschia dà damain unfrendas. En mintga cas n'haja il manader betg gì avunda indizis per sa decider per la schliaziun dad ir in suenter l'auter.
RR novitads 08:00