Cur che pumpiers, equipa da salvament e polizia èn arrivads mardi saira, curt suenter las 23:00 uras sin il parcadi da la Halla da la citad da Cuira, brischava la cabina dal manischunz dal camiun gia dal tuttafatg. Ils pumpiers han gì svelt sut controlla il fieu e tuttina è il camiun ars dal tut. La chasina da spetga dal bus ch'è gist dasperas è medemamain vegnida donnegiada.
Incendiament supponì
Tenor emprimas enconuschientschas quinta la polizia chantunala ch'in um da 31 onn haja dà fieu al camiun. El è vegnì arrestà e la procura publica e la polizia chantunala han avert in'inquisiziun cunter el pervi da quest suspect.