Ulteriur Grischun - Lavurs cun brischader da gas han chaschunà incendi
La raschun per l'incendi en il nov Museum d'art a Cuira è sclerida. Las inquisiziuns da la Polizia chantunala conferman che las lavurs cun in brischader da gas han effectuà l'incendi vid la fatschada.
Sco quai ch'in pledader da la polizia ha ditg envers la «Südostschweiz», hajan sbrinzlas fatg che l'isolaziun davos ils elements da la fatschada haja cumenzà a brischar.
Uss examinescha la procura publica sch'i vegn instradà in’inquisiziun penala. Per il chantun na datti strusch custs supplementars. Sco quai ch'i vesa ora surpiglia l'assicuranza d’edifizis ils donns.
