Ulteriur Grischun - La sanaziun dal convict cumenza cun l'installaziun da provisoris

L'avust cumenzan las lavurs da sanaziun dal convict da la Scola chantunala grischuna. Cunquai che las lavurs duran enfin l'october 2020 vegn installà in provisori per radund 100 scolaras e scolars. Quai sin l'areal da la chasa da scola Cleric, sper l'anteriur seminari da magisters.

Sco quai ch'il departament da construcziun communitgescha vegn il provisori construì cun moduls da lain, directamain vid il provisori da la mensa ch'ins na dovra betg pli. Lezzas localitads san ins duvrar uss sco local da cuminanza.

Ils 102 moduls da chombras singulas e dublas sco er las cellas da bogn e tualetta vegnan tschentadas sin trais auzadas. Plinavant vegn il provisori collià cun la rait da stgaudament a distanza da la citad da Cuira. Il 2020 cura ch’il convict è sanà vegn il provisori puspè demontà.

Ils custs per il provisori muntan a 2,9 milliuns francs.

In product grischun per il Grischun

Las aissas grischas da la surfatscha dals dus bajetgs ed ils roms cotschens han ina muntada speziala per Enrico Uffer, il manader e possessur da la Uffer SA, che construescha il provisori. Cotschen e grisch sajan la colurs da Grischun vacanzas, dal Grischun. Ses product saja indigen, uschia ch’i na dovria betg ina soluziun da l’exteriur.

In nov intent per ils moduls

Suenter 27 mais vegnan ils quadrins demontads e la fatschenta Uffer piglia enavos els per reutilisar els. In intent concret n’haja l’Uffer SA betg anc, di Enrico Uffer.

Ils quadrins èn er gia vegnids vendids e duvrads – uschia tar il campiunadi mundial da skis a San Murezzan, la festa da lutgaders Unspunnen ad Interlaken u a festivals da musica sco per exempel il «Moon and Stars» a Locarno. En cas ch’ins n’haja en passa 2 onns nagin intent per ils quadrins na saja quai era nagin problem, di Enrico Uffer, lura vegnian quels en lur magasins.

RR novitads 11:00